Монгол Улсын Соёлын яамны харьяа Чингис хааны өв, соёлын хүрээлэнгээс зохион байгуулсан “Бидний бахархал-Монголын нууц товчоон” хүүхдийн гар зургийн уралдааны шилдэг бүтээлүүдийн үзэсгэлэн 2021 оны 11-р сарын 12-ны өдөр Bluemon төвийн Норфей уран зургийн галерейд амжилттай зохион байгуулагдлаа. 
     Тус гар зургийн уралдааныг “Монгол бахархлын өдөр”-ийг тохиолдуулан зохион байгуулсан бөгөөд сурагчдын дунд эх түүхийн мэдлэгээ сорих, Чингис хааны байгуулсан гавьяа, Их Монгол Улсын түүхийн ач холбогдлыг ойлгуулах, мэдлэгээ зургийн аргаар илэрхийлэх боломжийг олгоход оршиж байгаа юм.
    Уралдаанд нийслэл болон Баян-Өлгий, Булган, Хөвсгөл, Сүхбаатар зэрэг аймгуудаас нийт 312 бүтээл ирснээс шаардлага хангасан дунд анги 88, ахлах анги 57 оролцогчийн 145 бүтээлд үнэлгээ өгч ажиллалаа. Хүрээлэнгийн захирлын тушаалаар байгуулагдсан шүүгчдийн баг хуралдаж дунд, ахлах анги ангилалд тус бүр тэргүүн, дэд, гутгаар байр, мөн 7 “тусгай байр”-н оролцогчдыг шалгарууллаа.